មណ្ឌលសិស្សសន្តយ៉ូហានបាទីស្ត
មណ្ឌលសិស្សសន្តយ៉ូហានបាទីស្ត មានដើមកំណើតតាំងពីយូរឆ្នាំកន្លងមកហើយ គឺបានបង្កើតឡើង ដោយលោកបូជាចារ្យ ប៊្រុយ ណូកុសម៍ ជនជាតិបារាំង ក្នុងឆ្នាំ២០០០ ដែលមានគោលបំណងក្នុងការចូលរួមជួយកាត់បន្ថយ នៃភាពអវិជ្ជា ភាពក្រីក្រ សម្រាប់យុវជនក្នុងប្រទេសកម្ពុជាយើង។ ជាការពិតយុវជនដែលបានទទួលអាហារូបករណ៍នៅ មណ្ឌលសិស្សសន្តយ៉ូហានបាទីស្ត គឺពិតជាមានគុណភាពខាងចំណេះដឹងវិជ្ជាជីវៈ អាចបន្តទៅរៀនថ្នាក់បរិញ្ញាបត្របន្តទៀតបាន រហូតបានបញ្ចប់នូវចំណេះជំនាញរៀងៗខ្លួន ក្នុងនោះមានយុវជនខ្លះក្លាយជា ពេទ្យ វិស្វករ អ្នកសារពត៌មាន ។ល។ ជាងនេះទៅទៀត ក៏មានយុវជនខ្លះបានរីកចម្រើនខាងផ្លូវវិញ្ញាណ ក្លាយជាគ្រិស្តបរិស័ទ ក្លាយជាបងប្រុស អ្នកបួសជាដើម។
បន្ទាប់មកក៏មានលោកឪពុក ហ្គូស្តាវ៉ូ ជនជាតិ អាហ្សង់ទីន ជាអ្នកទទួលខុសត្រូវបន្ត បានរយៈពេល២ឆ្នាំ ក្នុងការជួយសម្របសម្រួល និងណែនាំខាងផ្លូវវិញ្ញាណ ហើយលោក ក៏មានភារកិច្ចទៅរៀនបន្តនៅប្រទេស អ៊ីតាលីបន្ថែមទៀត។
ក្រោយមកទៀត រហូតដល់ពេលបច្ចុប្បន្ននេះ គឺមានលោកឪពុក រឿង ឆ័ត្រសិរី ជនជាតិថៃ ដែលជាចៅអធិការព្រះវិហារសន្តយ៉ូសែបផ្សារតូច លោកពុកក៏បន្តជួយជ្រោមជ្រែង សម្របសម្រួលខាងផ្លូវវិញ្ញាណ
ហើយលោកពុកក៏បានស្វះស្វែងជួយរកជំនួយ ក្នុងការជួយគាំទ្រ និងមើលថែប្អូនៗសិស្សមណ្ឌលយ៉ូហានបាទីស្តបានយ៉ាងល្អ និងមិនគិតពីការនឿយហត់ ទោះបីជាលោកពុក រវល់នឹងការងាររបស់លោកយ៉ាងណាក៏ដោយ។ លោកពុក ពិតជាឪពុក ជាគ្រូគង្វាលដែលល្អណាស់។ ដោយហេតុ លោកពុក មើលឃើញពីកង្វះខាតរបស់ប្អូនៗយុវជនកម្ពុជា ពិតជាត្រូវការកន្លែងរៀនសូត្រត្រឹមត្រូវ និងតាមព្រះហឬទ័យស្រឡាញ់របស់ព្រះជាម្ចាស់ចំពោះមនុស្សលោក តាមរយៈយុវសិស្សក្រីក្រទាំងអស់នោះហើយ ទើបលោក មិនគិតពីការនឿយហត់ ក្នុងការប្រកាសដំណឹងល្អ ដល់កូនៗ ដែលលោកពុក បានបង្កើតកម្មវិធីផ្សេងៗដើម្បីជួយពង្រឹងស្មារតីប្អូនៗខាងផ្លូវវិញ្ញាណជាច្រើនផង ដើម្បីអោយប្អូនចេះរិះគិតនៃការត្រាស់ហៅរបស់ព្រះជាម្ចាស់ក្នុងការរស់នៅប្រចាំថ្ងៃផងដែរ។