ក្រុមសង្កហៈ
គណៈកម្មការនេះ ជាក្រុមការងារជួយព្រះសហគមន៍មួយ ក្នុងពេលបង្កើតដំបូង ដោយលោកអភិបាលអេមិល ដេតម្ប ដើម្បីបង្ហាញសេចក្តីស្រឡាញ់ តាមព្រះបន្ទូលរបស់ព្រះអម្ចាស់យេស៊ូគ្រីស្ត៖ “យើងសុំប្រាប់ឲ្យអ្នករាល់គ្នាដឹងច្បាស់ថា គ្រប់ពេលអ្នករាល់គ្នាមិនបានប្រព្រឹត្តអំពើទាំងនោះ ចំពោះអ្នកតូចតាចជាងគេបំផុតម្នាក់ ដែលជាបងប្អូនរបស់យើងនេះ អ្នករាល់គ្នាក៏ដូចជាមិនបានប្រព្រឹត្តចំពោះយើងដែរ។”(មថ ២៥,៤៥) គណៈកម្មការនេះ ជាគ្រឹះមួយក្នុងការប្រកាសដំណឹងល្អសម្រាប់អ្នកដែលមិនទាន់ស្គាល់ព្រះជាម្ចាស់ និងព្រះសហគមន៍ តាមរយៈកិច្ចធម៌មេត្តាករុណា។ ជាស្ពាននាំមនុស្សគ្រប់ជាតិសាសន៍ទទួលការប្រណីសន្តោសរបស់ព្រះជាម្ចាស់។ តាមរយៈអ្នកក្រីក្រ នាំឲ្យយើងគ្រីស្តបរិស័ទឃើញព្រះយេស៊ូក្នុងពួកគេ គណៈកម្មការនេះ ក៏បម្រើព្រះយេស៊ូ តាមរយៈជំនួយជួយអ្នកក្រីក្រ ទោះបីសង្កត់ច្រើនជំនួយខាងផ្លូវកាយ តែក៏ជួយលើកទឹកចិត្ត និងផ្តល់ជំនឿខាងផ្លូវវិញ្ញាណដែរ។ ដើម្បីសហការគ្នាយ៉ាងល្អ គណៈកម្មការនេះ មានការប្រជុំជារឿយៗ យ៉ាងតិច មួយខែម្តង ដើម្បីរៀបចំផែនការ និងចាត់ចែងការងារ។ ជួយលោកបូជាចារ្យមានរៀបចំកម្មវិធី ជួយអ្នកក្រីក្រទាំងកាតូលិកនិងមិនមែនកាតូលិក។ ជាអ្នកជួយរកជំនួយជួយក្មេងក្រីក្របានរៀនសូត្រ។ ជួយអ្នកជំងឺ ដោយសហការជាមួយមណ្ឌលសុខភាព របស់ព្រះសហគមន៍ ដែលមានទីតាំងនៅក្នុងព្រះវិហារ រហូតដល់ចប់កម្មវិធី ក្រោយកូវិដ ឆ្នាំ ២០២១។ បានរៀបចំកម្មវិធី ចែកអំណោយប្រចាំឆ្នាំ ២ ដង ក្នុងឱកាសបុណ្យចូលឆ្នាំខ្មែរ និង បុណ្យភ្ជុំ និងតាមកាលទេសៈ ដែលអាចមានម្ចាស់ជំនួយមកជួយអ្នកក្រីក្រតាមរយៈយើង។ ក្នុងគណៈកម្មការនេះ ក៏មានក្រុមការងារមួយដែលជួយរំលែក រៀបចំសម្រាប់មនុស្សស្លាប់ ដែលយើងហៅថា ក្រុមជួយបុណ្យសព ដែលជួយសម្រួល រឿងការរៀបចំពិធី តាមដំណាក់កាលនែក្បួនបុណ្យសព, កន្លែង និងការសូត្រធម៌ឲ្យវិញ្ណាណក្ខ័ន្ធនោះដែរ។ បច្ចុប្បន្ននេះ យើងនៅតែបន្តបេសកកម្ម ដោយជួយលោកបូជាចារ្យនិងសហការជាមួយលោកចៅអធិការ សម្រាប់កម្មវិធីសប្បុរសធម៌ទាំងអស់ ដែលជួលកាល ត្រូវចេញឆ្ងាយពីព្រះវិហារ ដោយទៅតាមភូមិនានា ក្នុងដំបន់ឬព្រះវិហារជិតខាងដែរ។ សូមអញ្ជើញបងប្អូន ចូលរួមជាមួយសកម្មភាពនៃធម្មមេត្តារបស់យើង តាមរយៈកម្មការសង្គហៈនេះ ដើម្បី នាំព្រះអម្ចាស់យេស៊ូ ដែលមានព្រះហឫទ័យមេត្តា ដល់មនុស្សទាំងអស់ផង។