ក្រុមទីប្រឹក្សាព្រះសហគមន៍សន្តយ៉ូសែប ផ្សារតូច

តាមច្បាប់ព្រះសហគមន៍ មាត្រា ៥៣៦ វគ្គ ១ តម្រូវឲ្យតាមព្រះសហគមន៍ក្នុងភូមិ(parish) មានក្រុមទីប្រឹក្សាណែនាំថែទាំ(ព្រះសហគមន៍)Pastoral Council ដើម្បី ចូលរួមចំណែក នៃកិច្ចការណែនាំថែទាំដូចគង្វាល(Pastoral) ។ តាមពិត អភិបាលកិច្ចឬការណែនាំថែទាំ(ដូចគង្វាល)នេះ ជាតួនាទីផ្ទាល់របស់លោកអភិបាល លោកបូជាចារ្យ ដើម្បីថែទាំព្រះសហគមន៍ ឲ្យរីកចម្រើនខាងផ្លូវវិញ្ញាណ។

​ក្រុមទីប្រឹក្សាណែនាំថែទាំនេះ ជួយកិច្ចការតាមសមត្ថភាពរៀងៗខ្លួន ក្រោមការសម្រេចចិត្តក្នុងកិច្ចការរបស់ លោកគង្វាល ឬចៅអធិការ ក្រោយស្តាប់យោបល់ក្រុមទីប្រឹក្សា ដោយអនុវត្តិតាមលក្ខខណ្តិកៈដែលទទួលស្គាល់ពីលោកអភិបាល។ ការរួមធ្វើការជាមួយគ្នានេះ ជាសញ្ញានៃគំនិតសន្និបាតរបស់ព្រះសហគមន៍ពិតមែន។

​​ព្រះសហគមន៍សន្តយ៉ូសែប យើងចាប់ផ្តើមមានគណៈកម្មការដំបូង ៣ គឺ គណៈកម្មការពិធីបុណ្យ គណៈកម្មការអប់រំជំនឿ និង គណៈកម្មការសង្គហៈ។ ដោយព្រះសហគមន៍យើងមានព្រះអំណោយទានច្រើន ក៏បានបង្កើតក្រុមចលនាផ្សេងៗ ជាច្រើន ដូច្នេះ នៅពេលសម័យលោកចៅអធិការឆ័ត្រសិរី នៅឆ្នាំ ២០១៣ បានចាប់ផ្តើមរៀបចំបន្ថែមដំណាងរបស់ក្រុមចលាផ្សេងៗ ចូលក្នុងក្រុមទីប្រឹក្សានេះដែរ។